Charla práctica sobre linfedema organizada por ADICAM en Pontevedra
O vindeiro 13 de maio, a cidade de Pontevedra acollerá unha charla informativa centrada no linfedema. Este evento, que se celebrará ás 18:00 horas no Edificio de Benito Corbal núm. 47, está organizado por ADICAM como parte da súa programación de maio dedicada á sensibilización e prevención do linfedema.
Baixo o título “O equilibrio invisible: mente e corpo no linfedema”, a sesión terá un enfoque práctico e participativo, co obxectivo de proporcionar ferramentas útiles para o autocoidado e a mellora da calidade de vida. A charla será impartida por Sandra Soage, psicóloga, e Eloy Agulla, fisioterapeuta, ambos profesionais da Clínica NéBora. Ofrecerán unha visión integral que combina o enfoque físico e emocional do linfedema. Durante a sesión, abordarase que é o linfedema, as súas causas e, especialmente, a importancia da prevención e o tratamento precoz, aspectos crave para evitar complicacións e mellorar o benestar das persoas afectadas.
O linfedema é unha afección crónica que pode xurdir tras certos tratamentos, especialmente en procesos oncolóxicos, e que afecta significativamente a calidade de vida. Por iso, desde ADICAM insístese na necesidade de visibilizar esta realidade, promover información rigorosa e ofrecer recursos accesibles á poboación. Esta actividade forma parte do programa do Mes do Linfedema de ADICAM, aínda que nesta ocasión quérese pór especial énfase na cita de Pontevedra polo seu enfoque práctico. A charla está aberta a todas as persoas interesadas, sendo necesaria inscrición previa no teléfono 629 945 925.
