Os Traxes dunha Vida: exposición de etnografía e indumentaria tradicional en Pontevedra
Os Traxes dunha Vida propón unha viaxe pola memoria etnográfica de Galicia a través das pezas de roupa que acompañaron a vida de dúas mulleres galegas de distinta condición social entre finais do século XIX e comezos do XX. A exposición, presentada pola Asociación Etnográfica Sete Espadelas, permite coñecer dous percorridos vitais: o dunha muller nacida nunha aldea da montaña e o doutra procedente dunha próspera vila costeira.
A mostra reúne 100 manequíns e máis de 1.000 pezas, orixinais ou reproducidas a partir de modelos da época, para amosar a vida cotiá, os ritos, os traballos, as celebracións e os modos de vestir dunha Galicia desaparecida, pero aínda presente na memoria colectiva. A la e o liño articulan este percorrido pola historia social e cultural galega.
A inauguración será o martes 22 de setembro de 2026 ás 19:30 h na Sala de exposicións do Pazo da Cultura de Pontevedra. A exposición poderá visitarse do 23 de setembro ao 8 de novembro: de martes a venres, de 18:00 a 21:00 h; os sábados, de 12:00 a 14:00 e de 18:00 a 21:00 h; e os domingos e festivos, de 12:00 a 14:00 h. Os luns permanecerá pechada. Tamén se ofrecen visitas guiadas con inscrición previa.
