Faladoiro sobre Familias e a Era Dixital en Pontevedra
No marco da campaña Escola saudable de Ecoloxistas en Acción, a comunidade educativa de Pontevedra está convidada a participar no evento organizado pola ANPA Bolboreta no CEIP de Cabanas de Saceldo. Baixo o título Desconectar para conectar. Familias na era dixital, o encontro terá lugar o martes 26 de maio ás 18:30 horas. Ademais, poderase visitar a exposición do ilustrador Kiko Da Silva, titulada Medrar con Pantallas NON é igual a progreso, do 26 de maio ao 5 de xuño no CIP de Cabanas e do 8 ao 19 de xuño no IES Valle Inclán.
Tanto o faladoiro como a exposición están deseñados para fomentar a reflexión e concienciación sobre o uso dos medios dixitais no ámbito familiar, educativo e social. Abordaranse as consecuencias dun inicio temperán e desregulado destes hábitos e a importancia de establecer acordos familiares para atrasar a introdución do primeiro smartphone.
O faladoiro contará cun servizo de ludoteca para facilitar a asistencia de familias con nenos. Os relatores serán os coordinadores galegos da campaña “escola saudable”, Xulio Carmona e Menchu Outón, que ofrecerán información científica sobre o impacto do uso prematuro de pantallas na saúde física e mental, o neurodesenvolvemento e a aprendizaxe. Ademais, discutiranse as recomendacións da Asociación Española de Pediatría, que suxiren cero pantallas ata os 6 anos e un uso limitado para maiores, incluíndo o tempo escolar.
