Concerto de Treixadura en Ponte Caldelas
O 29 de agosto de 2026, Treixadura ofrecerá un concerto na Praza Frei Antonio Orge de Ponte Caldelas, en Pontevedra. A actuación forma parte das Festas das Dores e presenta ao público unha proposta baseada na forza do canto colectivo e da música tradicional galega.
A banda interpretará Portalén, o seu novo traballo discográfico, nun espectáculo que combina canto e gaita e eleva a tradición galega a unha dimensión artística contemporánea. Fiel á súa traxectoria, Treixadura recupera melodías anónimas, crea novas composicións e reivindica o valor evocador da música compartida.
O concerto comezará ás 21:00 horas e intégrase no programa +Música, unha iniciativa da Deputación destinada a apoiar a programación cultural dos concellos de menos de 50.000 habitantes da provincia e a difundir e fomentar a lingua e a cultura galegas.
