“Xogando coa arte” con Migallas Teatro en Pontevedra
A actividade “Xogando coa arte” é a última sesión dun dos seis obradoiros organizados polas Concellerías de Cultura e de Normalización Lingüística do Concello de Pontevedra, baixo a coordinación de Migallas Teatro. Este evento ten como obxectivo fomentar a expresión dramática, plástica e musical, así como a práctica de xogos tradicionais entre os máis novos, creando un espazo de socialización en galego.
Un total de 75 nenos e nenas participaron no obradoiro, onde aprenderon e practicaron máis de 30 xogos e ditos tradicionais, ademais de gozar de numerosos bailes, cancións e actividades de expresión dramática. Todas as actividades e creacións artísticas estiveron inspiradas na vida e obra de Maruja Mallo. Este xoves 26, os participantes terán que superar as últimas probas que lles plantexará o pirata Escarapote para poder acceder ao mapa do seu tesouro.
O evento terá lugar no Recinto Feiral do Pazo da Cultura de Pontevedra.
