Hevia en concerto no Pazo da Cultura de Pontevedra
Hevia ofrecerá un concerto especial en Pontevedra para celebrar o 25.º aniversario da concesión do Platinum Europe Award polo seu mítico álbum Tierra de Nadie e dunha xira que levou a súa música a máis de 40 países. O gaiteiro asturiano, coñecido por revolucionar a música celta coa gaita electrónica e por vender tres millóns de discos en todo o mundo, repasará os seus grandes éxitos xunto cunha potente banda.
O repertorio incluirá temas que xa forman parte do folk internacional, algúns revisados no seu novo traballo discográfico. Hevia estará acompañado pola súa irmá María José Hevia nas percusións tradicionais, ademais de Rubén Rebolleda nos teclados, Paco Yebra no baixo eléctrico e Lauren Stradmann na batería. O concerto contará tamén coa colaboración especial da Banda de Gaitas Airiños de San Xulián, da Asociación Cultural Foula e da Agrupación Folklórica CELME.
O concerto será o 7 de novembro de 2026, ás 20:30 horas, no Pazo da Cultura de Pontevedra. José Ángel Hevia interpretará frautas, gaita acústica e gaita electrónica. Ao longo da súa traxectoria recibiu, entre outros recoñecementos, un premio Ondas, varios Premios da Música, o premio Amigo e o Platinum Europe Award.
