Herbas e rituais de San Xoán con Vaipolorío en Pontevedra

A asociación Vaipolorío presenta unha das actividades máis emblemáticas da súa programación anual: unha xornada dedicada ás herbas e os rituais de San Xoán, dirixida por Pablo Carro. O evento celebrarase o próximo xoves 22 de xuño ás 19:30 horas en Ponte da Condesa, Tomeza, Pontevedra.

A iniciativa incluirá unha recollida de plantas nos arredores do río Gafos, permitindo aos participantes reunir as especies necesarias para preparar o tradicional “cacho”. Segundo a tradición popular, estas herbas, moitas delas coñecidas polas súas propiedades medicinais, deben permanecer en auga durante a noite de San Xoán para recibir a influencia do orballo e a luz da lúa.

Ao amencer, a auga utilízase para lavar o rostro e o corpo. A crenza popular sostén que este ritual non só favorece a beleza e o benestar, senón que tamén protexe contra as meigas e as malas enerxías.