Exposición: “Debuxar coa luz. A fotografía en Pontevedra no século XIX”
O Museo de Pontevedra acolle no Edificio Castelao unha exposición que reúne o traballo de fotógrafos profesionais e afeccionados que realizaran a súa labor en Pontevedra entre 1843 e 1900. A mostra, titulada “Debuxar coa luz. A fotografía en Pontevedra no século XIX”, compónse de arredor de 300 fotografías, na súa maioría orixinais de devandita época, así como de máis de un cento de obxectos e mobiliario da época.
Esta exposición é o resultado de máis de 20 anos de investigación levada a cabo polas comisarias Reis Camiña Castro e Cristina Echave Durán, conservadoras do Arquivo Gráfico do museo. A proposta ofrece un percorrido temático que se compón principalmente de fotografías orixinais do século XIX, complementadas con algunhas reproducións a grande escala e numerosos obxectos da época. Ademais, recréase un estudo fotográfico do século XIX, incorporando pezas orixinais que pertencían a Francisco Zagala.
O equipo de Educación do museo ofrece visitas guiadas todos os xoves ás 18:00 horas. Durante os tres meses e medio que permanecerá aberta a exposición, levaranse a cabo actividades dirixidas a diversos públicos. En febreiro e marzo, desenvolverase un obradoiro de colaxes animadas, destinado a persoas de calquera idade a partir de 8 anos, que utilizará as fotografías antigas para crear pequenas animacións coa técnica de “stop motion”. Finalmente, en marzo celebrarase unha xornada sobre arquivos gráficos e museos, con conferencias sobre a adquisición, conservación e difusión de arquivos gráficos desde os museos.
