Baixo a Agulla 2026: xornada de vinilos e música independente en Pontevedra
Baixo a Agulla é unha xornada dedicada á cultura do vinilo e á música independente, organizada polo Clube do Disco Pontevedra. A primeira edición celebrarase o 12 de setembro de 2026 en Nasantiña, Pontevedra, con postos de discos, sesións de DJs, unha presentación literaria e música en directo.
Desde as 12:30 horas estarán presentes Ferror Records, Taûme Records, Maldita Ciudad Records, Rock This Town e o propio Clube do Disco, con selos independentes, distribución, vinilos de colección e propostas de diferentes estilos. Ás 14:00 horas actuarán como DJs Dirty Old Town e Arturo Delgado. Ás 18:00 horas, Fernando Fernández Rego presentará Andrés do Barro. A xénese do pop en galego, un libro sobre a vida, a obra e a relevancia do artista galego.
A música en directo comezará ás 19:30 horas con Ceremonia, proxecto de Brais e Dani, dous músicos do Grove de 16 anos que exploran o indie pop, o noise pop e o shoegaze. Será o seu primeiro concerto. Ás 21:00 horas actuará Legítimo Polvo, proxecto de Mack Páramo situado entre o synth-punk, o post-punk e a electrónica, con caixas de ritmos, sintetizadores e guitarras. O encontro pretende consolidar en Pontevedra un espazo común para quen edita, distribúe, vende e escoita música independente.
