‘Aquí Cántase’ no centro histórico de Pontevedra

O vindeiro venres 7 de agosto, a partir das 21:00 horas, as prazas máis emblemáticas do centro histórico de Pontevedra encheranse de voces coa celebración de Aquí Cántase. Este evento de canto comunitario, promovido polo Concello de Pontevedra e a asociación de Música Tradicional Maravallada, dará comezo ás festas da Peregrina transformando a cidade nun gran escenario ao aire libre aberto a toda a comunidade.

O proxecto, que comezou no 2017, acada este ano a súa décima edición, consolidándose como unha cita imprescindible. Trátase dunha intervención colectiva onde se espera superar novamente a participación de mil persoas. A actividade comezará ás 21:00 horas e desenvolverase de xeito sucesivo en catro espazos singulares do casco vello: a praza de Curros Enríquez, a praza do Teucro, a praza de Santa María e a praza do Peirao, fronte ao Parador. O público interpretará un repertorio composto por 20 cancións da música popular galega, cantando 5 pezas en cada localización.

Para facilitar o desprazamento dunha praza a outra, o evento contará co acompañamento musical da Treboada do Baixo Miño. Non se require experiencia previa nin coñecementos musicais para participar. A proposta vai máis aló do aspecto cultural, reivindicando o canto colectivo como unha experiencia terapéutica e de cohesión social. O canto grupal axuda a reducir o individualismo e a soidade, diminúe o estrés e a ansiedade, mellora o estado de ánimo e fomenta o sentimento de pertenza comunitaria.

Ademais, Aquí Cántase é un espazo de encontro inclusivo e interxeracional que promove a socialización entre a mocidade e o envellecemento activo, mellorando a calidade de vida das persoas maiores, en liña con diversas investigacións científicas e as recomendacións da Organización Mundial da Saúde (OMS).