Presentación do cómic ‘Marcopola 5. Terra a dentro’ por Jacobo Fernández en Pontevedra

O escritor e ilustrador Jacobo Fernández presenta o seu novo cómic Marcopola 5. Terra a dentro. O evento terá lugar o sábado 5 de xuño ás 12:30 horas na Libraría Paz de Pontevedra. Nesta ocasión, o autor estará acompañado polo libreiro Julio Iglesias.

A historia segue a Marcopola, quen, tras estrear pernechas, está preparada para recuperar o remo roubado. Acompañada dos seus fieis compañeiros Libro e Dragoneta, deixa atrás a Costa das Patacas para adentrarse no interior na procura de pistas. Durante a súa travesía, descubrirán paisaxes fabulosas, novos amigos, vellos inimigos perigosos e seres misteriosos. Calquera cousa pode pasar nesta incrible aventura, pasiño a pasiño, ¡Terra a dentro!

Jacobo Fernández Serrano (Vigo, 1971) é licenciado en Belas Artes, especializado en pintura pola Universidade Complutense. Como ilustrador, pintor, debuxante e autor de literatura infantil, publicou na colección Merlín de Xerais libros como A gardería de dona Bixelmina (2005) e A pedra e as formigas (2006). Destacan tamén as súas obras Mil cousas poden pasar. Libro I (2009), gañador do premio Merlín de literatura infantil, e Mil cousas poden pasar. Libro 2 (2011). Ademais, traballou en diversas editoriais e é coñecido pola serie de cómic Os amigos de Archimboldo Roque, publicada na revista Golfiño.