Conferencia de Manuel Gago sobre as árbores como memoria e identidade galega en Pontevedra
O Edificio Castelao do Museo de Pontevedra acolle o xoves 24 de setembro de 2026, ás 19:00 horas, a conferencia de Manuel Gago Irmáns de terra: as árbores como marcos de memoria e identidade na cultura galega. A sesión analizará o valor das árbores e da súa madeira como dispositivos de memoria para as persoas e as comunidades.
A conferencia partirá da memoria do fusilamento de Alexandre Bóveda, evocada a través do humilde resto dunhas cascas de piñeiro, e percorrerá o papel das árbores na cultura galega ao longo da historia. Tamén abordará a súa función como marcos vivos do espazo común, testemuñas dos grandes acordos e prolongación de quen xa morreu, así como a súa conversión en símbolos galegos a partir do Rexurdimento.
Manuel Gago Mariño (Palmeira, Ribeira, 1976) é doutor en Comunicación pola Universidade de Santiago de Compostela, director de culturagalega.gal e profesor de Ciencias da Comunicación na USC. Como divulgador e comisario de exposicións, promoveu iniciativas sobre a historia, a paisaxe e a cultura de Galicia, ademais de proxectos como Galicia 100. Obxectos para contar unha cultura, Alba de Gloria de Castelao, unha experiencia, Galicia, un relato no mundo e as sete mostras Cidades no tempo.
