Charla sobre o dano cerebral adquirido en Cambados

Dano Cerebral Galicia, a federación que agrupa as cinco asociacións dedicadas a esta discapacidade na comunidade autónoma, organiza o 17 de marzo en Cambados unha charla informativa. O obxectivo desta sesión é proporcionar información sobre as causas do dano cerebral, como o ictus ou os traumatismos cranioencefálicos, así como describir as secuelas que poden derivarse e sensibilizar sobre a importancia da prevención. Ademais, ofreceranse referencias sobre os recursos de atención dispoñibles para o dano cerebral adquirido na localidade.

A charla, que está programada en colaboración coa Escola Galega de Saúde para Cidadáns, terá lugar o martes 17 de marzo ás 17:00 no Salón Pitusa de Exposalnés (Paseo da Calzada, 1). A actividade é aberta ao público en xeral e terá unha duración estimada dunha hora e media. Aínda que a participación é gratuíta, requírese inscrición previa. Esta pode realizarse completando un formulario de inscrición ou contactando co Concello de Cambados no 881 943 148 ou con Dano Cerebral Galicia no 652 770 653.